پاکستان میں کرونا وائرس کے باعث مزید 2 افراد جان کی بازی ہار گئے

اسلام آباد - ملک میں کرونا وائرس کے باعث مزید 2 افراد جان سے گئے، کل اموات کی تعداد 42 جبکہ مریضوں کی تعداد 2764 ہوگئی،پنجاب 1087 کیسز کے ساتھ ملک کا سب سے زیادہ متاثرہ صوبہ۔ تفصیلات کے مطاب پاکستان میں کرونا وائرس کے مصدقہ کیسز 2764 سے تجاوز کر گئے ہیں۔ اب تک 42 افراد جان کی بازی بھی ہار گئے۔

جبکہ یہ بھی خدشہ ظاہر کیا جا رہا ہے کہ ملک میں 25 اپریل تک کرونا وائرس کیسز کی تعداد 50 ہزار سے تجاوز کر سکتی ہے، اس حوالے سے حکومت نے سپریم کورٹ میں خصوصی رپورٹ بھی جمع کروائی ہے۔ بتایا گیا ہے کہ ہفتہ کو ملک بھر میں اب تک کرونا وائرس کے 125 کیسز رپورٹ ہوئے جن میں سے پنجاب میں 18، سندھ 56، خیبرپختونخواہ میں 29، بلوچستان میں 10، اسلام آباد 7 اور آزاد کشمیر سے 3 کیسز رپورٹ ہوئے ہیں۔

سرکاری پورٹل کے مطابق پنجاب میں کیسز کی مجموعی تعداد 1087 ہوگئی ہے ۔ گزشتہ روز وزیراعلیٰ پنجاب عثمان بزدار نے صوبے میں 1069 کیسز کی تصدیق کی تھی۔صوبے میں اب تک کورونا سے 11 افراد جاں بحق بھی ہوچکے ہیں۔ سندھ میں ہفتہ کو کرونا وائرس کے اب تک مزید 56 کیسز سامنے آچکے ہیں جو سرکاری پورٹل پر رپورٹ کیے گئے ہیں جس کے بعد صوبے میں کیسز کی مجموعی تعداد 839 بتائی گئی ہے۔

صوبائی محکمہ صحت کی جانب سے 47 نئے کیسز کے ساتھ 830 کیسز کی تصدیق کی گئی ہے اور صوبے میں ہلاکتوں کی تعداد 14 ہے۔ ہفتہ کواسلام آباد میں کرونا وائرس کے مزید 7 کیسز سامنے آئے جو سرکاری پورٹل پر رپورٹ کیے گئے۔پورٹل کے مطابق وفاقی دارالحکومت میں کیسز کی مجموعی تعداد 75 ہوگئی ہے۔آزادکشمیر میں کرونا وائرس کے مزید 3 کیسز سامنے آئے ہیں جو سرکاری پورٹل پر رپورٹ کیے گئے، نئے کیسز کے بعد علاقے میں مجموعی تعداد 12 ہوگئی ہے۔صوبہ خیبر پختونخوا میں کرونا سے ہونے والی ہلاکتوں کی تعداد 13 ہوگئی۔ بلوچستان میں متاثرین کی مجموعی تعداد 185 ہوگئی۔ گلگت بلتستان میں کرونا وائرس کے مزید 1 کیس سامنے آیا جس کے بعد علاقے میں کیسز کی مجموعی تعداد 194 ہوگئی ہے